پاکستانی ورلڈ ریکارڈز جو ہمارے لیے باعث فخر ہیں۔

دنیا کی سب سے بڑی ایمبولینس آرگنائزیشن

ایدھی فاؤنڈیشن پاکستان میں قائم ایک غیر منافع بخش سماجی بہبود کی تنظیم ہے۔ اس کی بنیاد عبدالستار ایدھی نے 1951 میں رکھی تھی۔ ایدھی فاؤنڈیشن کے پاس دنیا کی سب سے بڑی رضاکارانہ ایمبولینس سروس ہونے کا گنیز ورلڈ ریکارڈ ہے۔ ایدھی فاؤنڈیشن اس وقت پورے پاکستان میں 5,000 ایمبولینسز چلا رہی ہے۔

کرکٹ کا سب سے کم عمر ٹیسٹ کھلاڑی

حسن رضا پاکستان کے سب سے کم عمر ٹیسٹ کھلاڑی ہیں جنہوں نے 14 سال 227 دن کی عمر میں زمبابوے کے خلاف فیصل آباد، پاکستان میں 1996 میں ڈیبیو کیا۔

اے لیول پاس کرنے کا ورلڈ ریکارڈ

پاکستان سے تعلق رکھنے والے علی معین نوازش نے ایک سال میں سب سے زیادہ اے لیول پاس کرنے کا گنیز ورلڈ ریکارڈ اپنے نام کررکھا ہے۔ علی معین نے 2009 میں ایک قابل ذکر 23 اے لیولز حاصل کیے۔

کم عمر مائیکروسافٹ سرٹیفائیڈ پروفیشنل

پاکستان کی ارفع کریم رندھاوا نے 2004 میں 9 سال اور 8 ماہ کی عمر میں مائیکرو سافٹ سرٹیفائیڈ پروفیشنل (ایم سی پی) کا امتحان پاس کرکے دنیا بھر میں شہرت حاصل کی۔ انہوں نے ایم سی پی کا سرٹیفیکیشن حاصل کرنے والی سب سے کم عمر شخص ہونے کا گنیز ورلڈ ریکارڈ اپنے نام کیا۔

شطرنج میں جیتنے کا ریکارڈ

پاکستان کی شطرنج کی کھلاڑی مہر گل نے 2022 میں منعقدہ فیڈریشن کپ میں 100 فیصد نتائج حاصل کرکے ایک نئے ریکارڈ قائم کیا تھا۔ انہوں نے 12 مقابلوں میں سے 12 جیت کر کامیابی حاصل کی، اور وہ اپنے مقابلوں کے دوران ایک بھی میچ نہیں ہاری۔

سب سے کم عمر نوبل انعام یافتہ

یہ اعزاز پاکستان کی ملالا یوسف زئی کو حاصل ہے۔ انہیں 2014 میں صرف 17 سال کی عمر میں امن کا نوبل انعام دیا گیا۔ وہ کسی بھی شعبے میں نوبل انعام حاصل کرنے والی سب سے کم عمر شخص ہیں۔

پیریڈک ٹیبل کو ترتیب دینے کا ریکارڈ

نو سالہ کشمیری لڑکے زیدان حامد نے بے ترتیب کیمسٹری پیریڈک ٹیبل کو 5 منٹ 41 سیکنڈ میں ترتیب دے کر گنیز ورلڈ ریکارڈ کا ٹائٹل اپنے نام کرنے میں کامیاب رہے۔

تیز ترین کرکٹ باؤلر

انٹرنیشنل کرکٹ میں سب سے تیز ترین گیند کرنے کا اعزاز پاکستان کے سابق فاسٹ باؤلر شعیب اختر کے پاس ہے جنہوں نے 2003 ورلڈ کپ میں انگلینڈ کے خلاف میچ میں 161.3 کلومیٹر فی گھنٹہ کی رفتار سے گیند کی تھی۔

سب سے بڑا انسانی پرچم

فروری 2014 میں، پاکستان نے لاہور کے نیشنل ہاکی سٹیڈیم میں 29,040 افراد کی شرکت سے سب سے بڑا انسانی پرچم بنانے کا گنیز ورلڈ ریکارڈ قائم کیا۔ اس ریکارڈ کی توثیق گنیز ورلڈ ریکارڈز کی ایک ٹیم نے کی تھی۔